உங்கள் பேனாக்களை மட்டுமே
உடைத்துள்ளோம்,
மற்றப்படி நீங்கள்
எழுதுவதற்கு தடையேதுமில்லை,
உங்கள் உதடுகளை
மட்டுமே தைத்துள்ளோம்,
மற்றப்படி நீங்கள்
பேசுவதற்கு தடையேதுமில்லை,
உங்களின்
ஒளிப்படக்கருவிகளின்
படச்சுருள்களை மட்டுமே
ஒளித்து வைத்துள்ளோம்
மற்றபடி நீங்கள்
விரும்பியவற்றை படம்பிடிக்கலாம்,
அச்சகங்கள், ஊடகங்கள்
உங்களின் விருப்பத்தின்படியே
விலை பேசியுள்ளோம்,
மற்றபடி இங்கே நீங்கள்
விரும்பியவற்றை
செய்ய உங்களுக்கு
எந்த வித தடையுமில்லை..
நீங்கள்
சுதந்திரமாக இருப்பதாய்
எங்களால் மட்டுமே
உங்களை
சொல்ல வைக்கவும் முடியும்.
நம்புங்கள்
நீங்கள் சுதந்திரமாகத்தான் இருக்கிறீர்கள்!