நான் தொலைந்துபோகக்கூடும்

ஒரு நாள் என்னிலிருந்து

நான் தொலைந்துபோகக்கூடும்..

இப்போது என்னை விரும்புபவர்கள்

வெறுப்பவர்களாகவும்,

இப்போது என்னை வெறுப்பவர்கள்

விரும்புபவர்களாகவும்

மாறிப்போவார்கள் அன்றிலிருந்து.

வள்ளல்கள்

அம்மா வழித் தாத்தா ஒருவர்
ஊரிலிருந்து வருவதாலேயே
"ஊர்த்தாத்தா" என்றழைப்போம்

வயது வாரியாக
நாலணா முதல் நான்கு ரூபாய் வரை
என் வயதொத்த அனைவருக்கும்
வாரிக் கொடுப்பதுண்டு .

வருகையை எதிர்பார்த்து
வள்ளலென சொல்லித் திரிவோம்

வருடங்கள் கழிந்த பின்னொரு நாளில்
போதை முற்றிய பொழுதொன்றில்
என் தந்தை, பிறர் சொத்துக்கள்
அனைத்தையும் அவர் சூறையாடிய
கதையொன்றை உளறிக் கொட்டினார்.

வள்ளல்களாய் காண்பிப்போர் யாரும்
உண்மையில் வள்ளல்களில்லை
என்பதை அறிவதொன்றும்
அவ்வளவு எளிதில்லை.